Juzuu 30 (Amma)

[1] Wanaulizana nini hao makafiri?

[2] Wanaulizana khabari kubwa, khabari ya kufufuliwa,

[3] Ambayo wao wamezama ndani yake kukhitalifiana baina ya wenye kuikataa na wenye kuitilia shaka.

[4] Kuwazuia kuulizana huko wanaambiwa kuwa watakuja ujua ukweli wa mambo hapo watapo ona kufufuliwa kumetokea khasa.

[5] Tena kuwazuia, watakuja jua itapo wateremkia adhabu.

[6] Kwani wao hawaoni Ishara za uweza wetu kwamba Sisi tumeifanya ardhi imetandikwa upatikane utulivu juu yake na iwezekane kutembea juu yake?

[7] Na tukaifanya milima ni vigingi vya ardhi vya kuituliza? Sehemu ya gamba gumu lilio juu ya ardhi linfikilia kiasi ya kilomita 60 unene wake, na inazidi mikunjo, mifimbi, inapanda juu kuwa milima, na huteremka chini kuwa ni vina vya bahari; na hiyo hulingana kwa sababu ya uzito unao patikana kutokana na milima. Na kulingana huko hakuharibiki ila kwa kubugunyika, kwani gamba kavu la ardhi linazuiliwa na milima, kama vigingi vinavyo zuilia khema. (Rejea Maoni ya Wataalamu juu ya Aya 7 ya Surat Qaf).

[8] Na tukakuumbeni kwa jozi, wanaume na wanawake?

[9] Na tukafanya kulala kwenu ni mapumziko ya machofu ya kazi? Kulala usingizi ni kusita nishat'i ya sehemu ya ubongo yenye kutambua na kuwa macho. Yaani gamba la ubongo, au kupunguka nishat'i yake kwa wingi, ukilinganisha na daraja za nishat'i ya sehemu za viungo vilio baki. Na kwa hivyo kunapunguka nguvu na joto la mwili, tena mwili hapo wakati wa usingizi hupata kutua na kupumzika baada ya kuhangaika viungo au akili au vyote viwili. Basi kazi za kimwili zote hupunguka isipo kuwa kazi za kusaga chakula, na kupitisha mkojo katika mafigo, na kutoka majasho katika ngozi, kwani yakisita hayo hupatikana madhara juu ya maisha ya mtu. Ama kuvuta pumzi huko nako hupunguka, na huwa ni kwa ndani zaidi, na huwa kwa kifua zaidi kuliko kwa tumbo. Na mpigo wa mishipa hupungua kasi kwa kunavyo tokana na moyo, na hudhoofika mkazano wa musulo (muscular tension), na kwa hivyo huwa taabu kupata harakati za kinyume. Na yote haya ni ili binaadamu apate kupumzika wakati wa kulala.

[10] Na tumeufanya usiku ni sitara kwenu kwa kiza kinacho kufunikeni.

[11] Na tumeufanya mchana ni wakati wa kuhangaika kwenu kutafuta cha kukusaidieni katika maisha yenu.

[12] Na tumesimamisha juu yenu mbingu saba zenye nguvu madhubuti.

[13] Na Sisi tumeliumba jua lenye mwangaza na linalo waka. Makusudio ya Assiraj Alwahhaaj, Taa yenye mwanga na joto, ni Jua. Na hayo kama ilivyo thibiti katika sayansi kuwa daraja ya joto la uso wake inafika daraja 6000. Ama kati yake daraja yake inazidi daraja 30 milioni kwa sababu ya mdidimizo mkubwa unao patikana juu ya madda ziliomo ndani yake. Na jua linatoa nishat'i hizi zifuatazo: 9 katika 100 ya miale ya Ultraviolet rays, 46 katika 100 ya miale ya mwangaza, 45 katika 100 miale ya joto, au Infra red rays. Na kwa hivyo hii Aya tukufu imeliita kuwa ni Taa yenye mwangaza na joto.

[14] Na tumeteremsha kutokana na mawingu yaliyo karibia kunyesha maji yenye kumiminika kwa nguvu. Mvua ndio kitu pekee kinacho toka asli yake maji matamu katika ardhi. Na asli ya mvua ni kukusanyika vijisehemu vya maji yanayo panda kutoka baharini, na maziwa na mito, yakakusanyika kama mawingu na yakageuka chembe za mvua au vipande vya barafu, na khatimaye yakaanguka kwa sura ya mvua au theluji.

[15] Ili tutoe kwa maji haya nafaka na mimea kuwa ni chakula kwa ajili ya watu na wanyama.

[16] Na mabustani yenye miti iliyo fungamana na matawi yake yameingiliana.

[17] Hakika siku ya uamuzi baina ya viumbe imewekewa miadi ilio kwisha kadiriwa kwa ajili ya kufufuliwa.

[18] Siku litakapo pulizwa barugumu na kufufuliwa watu, mtakuja kwenye mkutano makundi kwa makundi.

[19] Na mbingu zitapasuliwa kila upande hata zitakuwa ni milango milango.

[20] Na milima itaondolewa baada ya kung'olewa mwahala mwake, na kuvurugwa, ikawa unaiona kama sura ya milima na hali hiyo ni kifusi tu kilicho rindikwa, kama uonavyo mangati, sarabi, unaona kama sura ya maji nayo si maji.

[21] Hakika Jahannamu imekuwa kama ni kitu kinacho ngojea, walinzi wake wanawangojea watu watakao kuja kuingia.

[22] Yawe ni marejeo na mafikio kwa wenye kupindukia mipaka ya Mwenyezi Mungu.

[23] Watakaa humo dahari baada ya dahari.

[24] Hawataonja humo hata chembe ya upepo wa kuburudisha joto lake, wala kinywaji cha kupoza kiu chao.

[25] Lakini watakunywa maji yalio pita ukomo kwa umoto wake, na usaha unao miminika kutokana na ngozi za watu wa Motoni.

[26] Malipo ya kuwafikiana na vitendo vyao viovu.

[27] Kwani hao hawakutaraji kuwa itakuwapo kuhisabiwa, hata watende ya kuwaokoa humo.

[28] Wakazikadhibisha Ishara za Mwenyezi Mungu zenye kuthibitisha kufufuliwa kwa mkadhibisho mkali.

[29] Na kila kitu tumekidhibiti kwa kukiandika.

[30] Basi onjeni, wala hampati kwetu ila kuzidishiwa adhabu tu.

[31] Hakika wenye kumcha Mola wao Mlezi watapata kuokoka na adhabu, na wataipata Pepo,

[32] Na mabustani yenye matunda, na mizabibu mizuri,

[33] Na wanawari walio watipwatipwa wa hirimu yao,

[34] Na bilauri safi zilizo jaa pomoni,

[35] Hawasikii huko Peponi upuuzi wala uwongo.

[36] Ni malipo kutokana na Mola wako Mlezi, kwa fadhila yake na ihsani ya kutosha.

[37] Mola Mlezi wa mbinguni na duniani na vilio baina yao, ambaye rehema yake imeenea juu ya kila kitu. Hapana yeyote mwenye madaraka ya kusema mbele yake.

[38] Siku atakapo simama Jibrili na Malaika walio teuliwa nao wamenyenyekea, hasemi mmoja wao ila akipewa idhini na Arrahman, Mwingi wa rehema, kuwa aseme, naye atasema lilio sawa tu.

[39] Hiyo ndiyo siku isiyo na shaka. Basi atakaye na ashike njia ya kwenda kwa Mola wake Mlezi arejee kwa Imani, na a'mali njema.

[40] Hakika Sisi tumekuhadharisheni na adhabu itakayo tokea karibu, siku atakapo angalia mtu vitendo vyake vilivyo tangulizwa na mikono yake, na atakapo sema kafiri kwa kutamani kuokoka: Laiti ningeli bakia udongo baada ya kufa, nisifufuliwe wala nisihisabiwe!

[1] Ninaapa kwa kila kilicho pewa uwezo wa kuving'oa vitu kutokana na pahala pao kwa nguvu,

[2] Na kwa kila kilicho pewa uwezo wa kuvitoa vitu kwa utaratibu na ulaini,

[3] Na kwa kila kilicho pewa mbio za kutekeleza kazi yake kwa sahala na wepesi.

[4] Na kwa vinavyo shindania kutimiza waajibu ulio twikwa juu yao kushindania kwa juhudi,

[5] Na vinavyo dabiri, kupanga, mambo na kuyaendesha kwa mujibu wa vilivyo khusishwa,

[6] Bila ya shaka Saa ya Kiyama itafika; hiyo siku ambayo mpulizo wa mwanzo wa barugumu utavitikisa viumbe vyote,

[7] Na mpulizo huo utafuatiwa na wa pili ambao ndio utakao kuwa wa kufufuliwa watu.

[8] Siku hiyo nyoyo zitapapatika kwa khofu.

[9] Macho ya watu yatakuwa na huzuni, manyonge.

[10] Watu hawa husema duniani kwa kukanya kufufuliwa: Ati tutarudishwa sisi baada ya kwisha kufa, tuumbwe tena kama tulivyo kuwa?

[11] Tukisha kuwa mafupa yaliyo chakaa, ati tutarejeshwa tufufuliwe upya?

[12] Wanasema, kwa kukanya na kejeli: Kurejea huko kama kukitokea basi ni marejeo ya khasara, na sisi si watu wa kukhasiri.

[13] Msidhani kurejea huko ni kuzito. Kwani hayo ni ukelele mmoja tu,

[14] Mara maiti wote watahudhurishwa kwenye ardhi ya mkusanyiko!

[15] Ewe Muhammad! Imekufikilia hadithi ya Musa,

[16] Alipo mwita Mola wake Mlezi katika bonde lilio takaswa, linalo itwa "T'uwa"?

[17] Akaambiwa: Nenda kwa Firauni aliye pindukia mpaka katika udhalimu.

[18] Umwambie: Je! Huelekei kut'ahirika?

[19] Na mimi nikuongoze upate kumjua Mola wako Mlezi, umwogope.

[20] Musa akamwonyesha Firauni miujiza mikubwa.

[21] Lakini Firauni alimkadhibisha Musa kwa aliyo kuja nayo, na akamuasi kwa aliyo mwitia.

[22] Kisha akamgeuzia mgongo, akenda kujitahidi kumpinga.

[23] Akawakusanya wachawi, na akawaita watu,

[24] Akasema: Mimi ndiye Mola wenu Mlezi aliye mkubwa kabisa.

[25] Mwenyezi Mungu akampa adhabu kwa kauli yake ya mwisho, nayo ni vile kusema: Mimi ndiye Mola wenu Mlezi aliye mkubwa kabisa. Na akampa adhabu kwa kauli yake ya mwanzo, nayo ni kumkadhibisha Musa a.s.

[26] Hakika katika hadithi hiyo yapo mawaidha kwa mwenye kumkhofu Mwenyezi Mungu.

[27] Enyi mnao kanya kufufuliwa! Kukuumbeni nyinyi ni taabu zaidi au kuziumba mbingu, kuzikusanya sehemu zake zilio tawanyika mbali mbali,

[28] Na kunyanyua kimo chake, na zikakaa sawa hazina tafauti wala ila?

[29] Na akatia kiza katika usiku wake, na akautokeza mchana wake ukawa na mwangaza?

[30] Na ardhi baada ya hayo akaikunjua, na akaisawazisha, ikasilihi kukaliwa na watu wake?

[31] Akatoa ndani yake maji yake yanayo tibuka katika chemchem zake, na ikamiminika mito yake, na ikawa na mimea yake ya chakula kwa ajili ya watu na wanyama;

[32] Na milima akaithibitisha imara

[33] Kwa ajili ya manufaa yenu na wanyama wenu mnao wafuga!

[34] Kitakapo fika Kiyama ambacho vitisho vyake vitaenea kote,

[35] Siku atakapo kumbuka mtu vitendo vyake vya kheri au shari,

[36] Na Jahannamu ikadhihirishwa wazi, akaiona kila mwenye macho kuwa ndio malipo,

[37] Basi ama mwenye kupita mpaka kwa maasi yake,

[38] Na akajichagulia nafsi yake maisha yanayo pita njia,

[39] Basi Moto wa Jahannamu unao babua upepo wake ndio makaazi yake wala hana mengineyo.

[40] Na ama mwenye kukhofu ukubwa na utukufu wa Mola wake Mlezi, na akaizuia nafsi yake na matamanio ya kumpumbaza,

[41] Basi huyo nyumba ya neema ya Peponi ndio makaazi yake, wala hana penginepo.

[42] Ewe Muhammad! Wanakuuliza, ati, khabari za Saa ya Kiyama, itakuwa lini?

[43] Ujuzi wa hayo hauko kwako hata uwatajie.

[44] Ujuzi wa hayo uko kwa Mola wako Mlezi tu, si kwa mwenginewe. (Nabii Isa a.s. ambaye Wakristo wanasema ni Mwana wa Mungu, au ndiye Mungu, pia anasimuliwa katika Biblia kuwa hakuijua Saa na Siku ya Kiyama. Injili ya Mathayo inanukulu maneno ya Yesu: "Walakini habari ya siku ile na saa ile hakuna aijuaye, hata malaika walio mbinguni, wala Mwana, ila Baba peke yake.")

[45] Kwani waajibu wako ni kuwaonya wanao khofu si kuwatangazia wakati wake.

[46] Na wao siku watakayo iona hiyo Saa ya Kiyama ni kama kwamba hawakuishi duniani zaidi kuliko jioni moja tu, au mchana wake.

[1] Uso wake ulitaghayari kwa kuchukia na akageuka,

[2] Kwa sababu kamjia kipofu anamuuliza khabari ya Dini yake.

[3] Na wewe unajuaje, pengine huyo kipofu atatakasika kwa atayo yapata kwako,

[4] Au atawaidhika na mawaidha yamfae.

[5] Ama yule anaye jiona ametosheka kwa mali yake na nguvu zake,

[6] Wewe ndio unamkabili na unamshughulikia kumfikishia wito wako.

[7] Na wewe una lawama gani ikiwa yeye hakutakasika kwa Imani?

[8] Ama anaye kukimbilia kutafuta ilimu na uwongofu,

[9] Naye anamkhofu Mwenyezi Mungu .

[10] Wewe unampuuza.

[11] Hakika Aya hizi ni mawaidha.

[12] Mwenye kutaka atawaidhika kwa Qur'ani.

[13] Nayo Qur'ani imo katika kurasa zilizo tukuzwa kwa Mwenyezi Mungu,

[14] Zina cheo cha juu, na pahala palipo tukuka, zimetakasika na kila upungufu.

[15] Katika mikono ya Malaika ambao Mwenyezi Mungu amewafanya ndio mabalozi baina yake na Mitume wake;

[16] Walio bora, wema.

[17] Ameangamia mwanaadamu! Nini kilicho mfanya akufuru na hali Mwenyezi Mungu amemfanyia hisani zote hizi?

[18] Hakumbuki yeye kaumbwa kutokana na nini?

[19] Kutokana na maji ya kudharauliwa Yeye Mwenyezi Mungu alimwanzisha kumuumba akamjaalia apitie daraja mbali mbali za kukua.

[20] Kisha akamfanyia nyepesi njia ya kufikia Imani, na akamfunza njia hiyo.

[21] Kisha akamfisha na akamtukuza kwa kumtia kaburini.

[22] Na tena akipenda atamhuisha baada ya kufa kwake.

[23] Ni kweli mwanaadamu, juu ya kuwa umri wake mrefu duniani, hakutimiza aliyo amrishwa na Mwenyezi Mungu katika mambo ya Imani na ut'iifu.

[24] Hebu mtu na aangalie shani ya chakula chake - vipi tulivyo kipanga na kumsahilishia!

[25] Ni Sisi tumeiteremsha mvua kutoka mbinguni, ikateremka.

[26] Tena tukaipasua pasua ardhi kwa ajili ya mimea.

[27] Tukaotesha humo nafaka ambazo watu huzila na huweka akiba.

[28] Na mizabibu na mimea ya majani inayo liwa mibichi.

[29] Na mizaituni mizuri, na mitende yenye kuzaa,

[30] Na mabustani yaliyo songamana matawi ya miti yake,

[31] Na matunda ya kustaladhi nayo, na malisha ya kula nyama hoa (mifugo).

[32] Tumeotesha yote hayo kwa ajili ya faida yenu na wanyama wenu wa kufuga.

[33] Basi utakapo kuja ukelele wa Kiyama utakao tia uziwi masikio,

[34] Siku mtu atakapo mkimbia ndugu yake,

[35] Na mama yake, na baba yake,

[36] Na mkewe, na wanawe!

[37] Kila mmojapo katika hawa atakuwa na jambo lake la kumshughulisha!

[38] Zipo nyuso siku hii zenye mwangaza,

[39] Zenye kung'ara na kufurahi kwa neema za Mwenyezi Mungu.

[40] Na nyuso nyengine siku hii zina vumbi zimesawijika.

[41] Zimegubikwa na kiza na weusi.

[42] Wenye nyuso hizi ni makafiri wapotovu, ambao walio kuwa hawabali maasi waliyo kuwa wakiyatenda.

[1] Jua litakapo kunjwa na mwangaza wake ukafutwa,

[2] Na nyota ikazimwa nuru yao,

[3] Na milima ikaondoshwa hapo ilipo,

[4] Na ambao wa kuchukua mimba wakaharibu mimba zao,

[5] Na nyama mwitu wakusanywe kutoka vichakani mwao na mashimoni mwao, hawajijui hawajitambui kwa wingi wa kufazaika.

[6] Na bahari zikawa zinawaka moto,

[7] Na roho zikaunganishwa na viwiliwili vyao,

[8] Na mtoto wa kike aliye zikwa hai, akaulizwa kwa kumliwaza yeye, na kumshutumu aliye mzika hai,

[9] Kwa makosa gani kauliwa, naye hana dhambi? (Ilikuwa ada ya makafiri wa Kiarabu kabla ya Uislamu kuwazika watoto wao wa kike nao wahai! Baadhi ya Mabaniani wanawauwa watoto wao wa kike hata hivi leo huko India!!)

[10] Na nyaraka zilizo andikwa ndani vitendo vya watu zikakunjuliwa wakati wa hisabu.

[11] Na mbingu itapo ondoshwa pahala pake,

[12] Na Moto ukawashwa kwa mwako mkali,

[13] Na Pepo ikajongezwa ikawa karibu,

[14] Yatakapo tokea yote hayo, basi hapo tena kila nafsi itajua nini iliyo tanguliza, ikiwa kheri au shari.

[15] Naapa kiapo cha mkazo kwa nyota ambazo zinanywea zinapo chomoza, na hapo mwanga wake huwa khafifu,

[16] Zenye kwenda na hujificha wakati wa kuchwa kwake, kama paa wanapo jificha kwenye mapango yao.

[17] Na kwa usiku linapo pungua giza lake wakati unapo malizika.

[18] Na kwa asubuhi unapo anza mwangaza wake na ukavuma upepo wake,

[19] Hakika Qur'ani bila ya shaka ni kauli ya Mjumbe anaye toka kwa Mwenyezi Mungu, naye ni mwenye kuhishimiwa kwake,

[20] Mwenye nguvu katika kutekeleza waajibu wake, mwenye cheo na daraja mbele ya Mwenyezi Mungu Mwenye Kiti cha Enzi.

[21] Tena ni mwenye kut'iiwa, na muaminifu wa kuchukua wahyi miongoni wa walio juu.

[22] Na huyo Mtume wenu ambaye ni mwenzenu, mnaye mjua kuwa ana akili timamu, si mwendawazimu.

[23] Na ninaapa kuwa Muhammad s.a.w. bila ya shaka alimwona Jibrili katika upeo wa macho kwa mujibu wa inavyo onekana.

[24] Na Muhammad si bakhili wa kufikisha wahyi na kuwafunza watu.

[25] Wala huu wahyi (ufunuo) ulio teremshwa juu yake si kauli ya Shetani aliye fukuzwa kutoka kwenye rehema ya Mwenyezi Mungu.

[26] Basi njia gani iliyo ya uwongofu zaidi kuliko hii mnayo ifuata?

[27] Qur'ani si chochote ila ni ukumbusho na mawaidha kwa walimwengu wote.

[28] Kwa anaye taka, miongoni mwenu, kusimama sawa kufikilia haki na kweli.

[29] Na nyinyi hamwezi kutaka kitu ila anapo taka Mwenyezi Mungu, Mola Mlezi wa walimwengu wote.

[1] Itakapo pasuka mbingu,

[2] Na nyota zitakapo pukutika na kutawanyika,

[3] Na bahari zikafurika na kuingiliana kwa kuondoka viziwizi baina yao,

[4] Na makaburi yakafunuliwa na wakatoka maiti walio kuwamo,

[5] Hapo basi kila nafsi itajua nini kheri au shari iliyo tanguliza na iliyo chelewesha.

[6] Ewe mwanaadamu! Kitu gani kilicho kukhadaa wewe na Mola wako Mlezi Mtukufu hata ukafanya jeuri ya kwenda kumuasi? (Ni dhaahiri kuwa Sayyid Abdulla bin Ali bin Nassir aliye tunga utenzi wa Kiswahili maarufu uitwao Al Inkishaf aliiwaza Aya hii alipo tunga ubeti huu: Moyo wangu nini huzundukani Likughurielo hela ni nni? Hunelezi nami kalibaini Liwapo na sura nisikataye )

[7] Mungu wako huyo ndiye aliye kuumba nawe hukuwa chochote, akakuumba na viungo vya kukuletea manufaa, akakufanya umenyooka kwa umbo sawa sawa.

[8] Akakujenga na akakuleta katika sura yoyote aliyo itaka.

[9] Hamwachi? Bali nyinyi mnakadhibisha malipo ya Siku ya Kiyama!

[10] Na hakika wapo juu yenu Malaika walinzi, ambao ni waheshimiwa kwetu,

[11] Wanasajili vitendo vyenu vyote mvitendavyo, vya kheri na shari.

[12] Wanayajua mnayo yafanya ya kheri na ya shari

[13] Hakika wale walio ni wa kweli katika Imani yao wapo katika neema kubwa.

[14] Na hakika walio iacha amri ya Mwenyezi bila ya shaka watakuwa katika Moto unao unguza,

[15] Wataingia humo Siku ya Malipo.

[16] Na wala hawatatoka katika Jahannamu!

[17] Na nini kitakujuvya ni nini hiyo Siku ya Malipo, na mambo yake yamepindukia ujuzi wako na fikra zako?

[18] Tena ni nini kitacho kujuvya ni nini hiyo Siku ya Malipo kwa vitisho vyake na shida zake?

[19] Siku ambayo nafsi haitakuwa na mamlaka yoyote juu ya nafsi ya kuifaa au kuidhuru; na amri yote siku hiyo itakuwa ni ya Mwenyezi Mungu peke yake!

[1] Wataangamia wanao punja,

[2] Ambao wakijipimia wenyewe kwa watu hujitwalia ya kutosha na kuzidi,

[3] Na wakiwapimia watu kwa vipimo au mizani huwapunguzia haki yao wanayo stahiki, kwa dhulma!

[4] Hivyo haiwapitikii katika akili zao hawa wanao punja wenzao kwamba watakuja fufuliwa,

[5] Katika siku ya vitisho vikuu?

[6] Siku watapo simama watu kwa amri ya Mola Mlezi wa walimwengu wote na hukumu yake?

[7] Wacheni kupunja, na kughafilika na kufufuliwa! Kwani hakika waliyo andikiwa wakosefu katika a'mali zao mbovu, bila ya shaka yamo katika Sijjin.

[8] Na nini kitakujuvya nini hiyo Sijjin?

[9] Hicho ni Kitabu kilicho pigwa mistari baina ya maandishi yake.

[10] Wataangamia wanao kadhibisha siku itapo kuwa kufufuliwa na kuhisabiwa.

[11] Ambao wanaikanusha Siku ya Malipo.

[12] Na wala haikanushi Siku ya Malipo ila kila mwenye kupindukia mipaka mwingi wa madhambi.

[13] Na akisomewa Aya za Mwenyezi Mungu zenye kutaja kuwepo malipo husema: Huo ni uwongo wa walio tangulia!

[14] Ewe uliye kiuka mipaka! Wacha kauli hiyo potovu. Bali nyoyo za wenye kupindukia mipaka imegubikwa na ukafiri na maasi waliyo yatenda.

[15] Hakika ni kweli kuwa hao wanao kadhibisha watazuiliwa siku hiyo rehema ya Mwenyezi Mungu kwa sababu ya maasi waliyo yachuma.

[16] Kisha hakika hao bila ya shaka wataingia Motoni.

[17] Kisha wataambiwa kwa kuwakebehi: Hii basi ndiyo adhabu inayo kuteremkieni ambayo mlikuwa mkiikanusha duniani!

[18] Ni hakika kuwa vitendo vya watu wema bila ya shaka vimeandikwa katika I'liyyin.

[19] Na nini cha kukujuvya nini I'liyyin?

[20] Hicho ni Kitabu kilicho andikwa wazi maandishi yake,

[21] Wanakihudhurisha na kukihifadhi Malaika walio kurubishwa.

[22] Hakika watu wema bila ya shaka watakuwa katika neema za Peponi,

[23] Juu ya viti vya enzi, wakiziangalia neema na ukarimu alio wakirimu Mwenyezi Mungu.

[24] Utaona katika nyuso zao uchangamfu na mng'aro wa neema.

[25] Wakinyweshwa kinywaji safi kilicho hifadhiwa;

[26] Kuhifadhiwa huko hakukuzidisha ila uzuri wake. Na kupata neema hizo, basi, na washindanie wanao shindana.

[27] Cha kuchanganyia kinywaji hicho ni maji ya Tasniim ya Peponi,

[28] Nayo ni chemchem wanao inywa walio kurubishwa si wengineo, katika watu wa Peponi.

[29] Wale walio kuwa wakibeba madhambi kuipingia Dini walikuwa wakiwacheka kuwakejeli Waumini duniani.

[30] Na wakipita Waumini mbele yao basi wao hukonyezana kwa kuwabeza.

[31] Na hao wakosefu wakirejea kwa ahali zao hurejea kwa furaha na kuona ladha kwa vile kuwakejeli Waumini.

[32] Na wakiwaona Waumini husema: Ama hakika hawa wamepotea kweli kwa kumuamini Muhammad.

[33] Wala hao wakosefu hawakutumwa wawe wa kuwahukumu Waumini kwa kuwaongoza au kuwapoteza, wala kuwa ni walinzi wa vitendo vyao.

[34] Basi Siku ya Malipo walio amini watakuwa ndio wa kuwacheka hao makafiri kwa kuwalipizia kile kicheko chao na kejeli yao ya duniani.

[35] Ilhali wako juu ya vitanda na matakia watakuwa Waumini wakiziangalia neema za Mwenyezi Mungu alizo wapa.

[36] Je! Makafiri watalipwa huko Akhera kwa waliyo yatenda duniani?

[1] Mbingu itapo chanika, ikaamrishwa iondoke,

[2] Na ikamsikiliza Mola wake Mlezi na ikamt'ii, na ndio maelekeo yake isikie na kut'ii,

[3] Na ardhi ikazidi upana wake kwa kulazwa milima na kuondolewa kifusi chake,

[4] Na ardhi ikatoa nje maiti na khazina ziliyo kuwamo ndani yake, na ikaachana navyo vyote hivyo,

[5] Na ikamwelekea Mola wake Mlezi kwa kuzidi kutanuka kwake na kutoa vilio kuwemo ndani yake na kuachana navyo, na hayo ni haki yake kuwa. Yakitokea yote hayo yaliyo tangulia kusimuliwa basi kila mtu atapata malipo ya vitendo vyake.

[6] Ewe mtu! Hakika wewe unafanya juhudi katika vitendo vyako vikufikishie lengo lako. Basi utakuja kukutana na Mola wako Mlezi kwa a'mali yako, naye atakulipa kwayo.

[7] Ama mwenye kupewa daftari la vitendo vyake kwa mkono wake wa kulia

[8] Basi atahisabiwa kwa hisabu nyepesi,

[9] Na atarejea kwa jamaa zake Waumini naye furahani.

[10] Ama mwenye kupewa daftari lake kwa mkono wa kushoto wake nyuma ya mgongo wake kwa kudharauliwa shani yake,

[11] Huyo atatamani ajiue,

[12] Na ataingia Motoni aungulie mbali!

[13] Kwani huyo hakika duniani alikuwa furahani kati ya jamaa zake akitanaamu na pumbao alilo kuwa nalo hata akapuuza a'mali ya kuitenda kwa mustakabali wake.

[14] Hakika huyo alidhani kuwa kabisa hatorejea kwa Mwenyezi Mungu akamhisabu.

[15] Bali atarejea, na atahisabiwa! Kwani Mola wake Mlezi alikuwa anamwona vyema yeye na vitendo vyake.

[16] Basi naapa kiapo cha mkazo kwa wekundu wa mbingu baada ya kuchwa jua!

[17] Na kwa usiku na unavyo vikusanya vyote katika giza lake, wanaadamu, wanyama na vyenginevyo!

[18] Na mwezi unapo kamilika kupevuka na kutimia nuru yake,

[19] Hapana shaka yoyote mtakutana na hali baada ya hali, baadhi yake zina shida zaidi kuliko nyenginezo, za kufa na kufufuliwa na vitisho vya Kiyama.

[20] Wana nini hawa makafiri yanayo wazuia wasimuamini Mwenyezi Mungu na kufufuliwa baada ya kuwekwa wazi dalili zake zote za kuwajibika kwake?

[21] Na pindi wakizisikia Aya za Qur'ani hawasujudu wakanyenyekea?

[22] Bali watu hawa, kwa ukafiri wao, wanakanusha kwa inadi na kutakabari kuikataa Haki!

[23] Na Mwenyezi Mungu ni Mwenye kujua kabisa hayo wanayo yadhamiria katika nyoyo zao.

[24] Basi wabashirie, kwa kejeli, kuwa watapata adhabu ya kutia uchungu.

[25] Lakini walio amini na wakatenda mema watapata, kutoka kwa Mwenyezi Mungu, ujira usio wakatikia na wala usio kuwa na hisabu juu yao.

[1] Naapa kwa mbingu yenye Buruj au Manaazil, njia au vituo ambavyo nyota hupitia katika nyendo zake, Buruuj au Manaazil ndio huu mkusanyiko wa nyota unao onekana kwa sura namna mbali mbali mbinguni. Hizo Buruuj zimegawika sehemu kumi na mbili ambazo ardhi inazipitia inapo lizunguka jua.

[2] Na kwa Siku iliyo ahidiwa kuwa ndiyo Siku ya Hisabu na Malipo,

[3] Na kwa viumbe watao hudhuria Siku hiyo wakaona vitisho na ajabu zitakazo kuwepo,

[4] Hakika Mwenyezi Mungu amewalaani watu walio chimba khandaki katika ardhi,

[5] Wakawasha moto kuwatumbukiza ndani yake Waumini ili kuwatesa,

[6] Na wao wamekaa ukingoni mwake wakishuhudia mateso yanayo wapata Waumini.

[7] Na wao wapo hapo wamehudhuria kwenye mateso wanayo watendea Waumini.

[8] Na hapana walilo lichukia kwa hao Waumini ila ni kuwa wakimuamini Mwenyezi Mungu Mwenye nguvu ambaye adhabu yake huogopwa, Msifiwa anaye tarajiwa thawabu zake.

[9] Ambaye, peke yake, ndiye Mwenye ufalme wa mbingu na ardhi. Na Mwenyezi Mungu ni shahidi anashuhudia yote wayatendayo Waumini na makafiri na atawalipa kwayo.

[10] Hakika walio watia matatani Waumini wanaume na Waumini wanawake kwa maudhi na kuwaadhibu kwa moto, kisha wasitubu na kurejea nyuma watapata Akhera adhabu ya Jahannamu kwa ukafiri wao, na watapata adhabu ya kuunguzwa kwa kule kuwaunguza moto Waumini.

[11] Hakika hao walio kusanya kwenye Imani ya Mwenyezi Mungu vitendo vyema watapata Mabustani yapitayo mito kati yake. Neema hiyo waliyo lipwa ni kufuzu kukubwa.

[12] Hakika mshiko wa Mola wako Mlezi kuwashika majabari umefika ukomo kwa ukali wake

[13] Ni Yeye peke yake ndiye Mwenye kuanza kuumba, na kisha ni Yeye anaye rejeza tena,

[14] Na Yeye ni Mwingi wa msamaha kwa mwenye kutubu na akarejea, na Mwingi wa mapenzi kwa mwenye kumpenda na akamt'ii.

[15] Yeye ndiye Mwenye Kiti cha Enzi na Mwenye kukimiliki, na Mkuu kwa dhati yake na sifa zake.

[16] Ni Mtendaji kwa alitakalo, na hendi kinyume na uweza wake yeyote anaye taka.

[17] Je! Imekujia, ewe Muhammad, hadithi ya kile kikundi kilicho a'si katika mataifa yaliyo kwisha pita?

[18] Kaumu ya Firauni na Thamudi na yaliyo washukia katika malipo ya kushikilia kwao upotovu?

[19] Bali hao makafiri katika kaumu yako ni shadidi zaidi katika kukukadhibisha kuliko hawa walivyo wakadhibisha Mitume wao.

[20] Na Mwenyezi Mungu anawaweza hao, na anawajua vilivyo.

[21] Bali hii ulio waletea ni Qur'ani tukufu inadhihirisha hoja za ukweli wako.

[22] Imo katika Ubao Ulio Hifadhiwa, hapana uwezo unao weza kuipotoa au kuigeuza

[1] Naapa kwa mbingu na nyota inayo tokeza usiku!

[2] Na kitu gani kitakujuvya ukweli wa nyota hii? Ni hiyo inayotoa mwanga wake katika giza.

[3] Na kitu gani kitakujuvya ukweli wa nyota hii? Ni hiyo inayotoa mwanga wake katika giza.

[4] Hapana nafsi ila inayo mlinzi wa kuiangalia na kudhibiti vitendo vyake.

[5] Basi naafikiri mtu, yeye kaumbwa kutokana na nini?

[6] Ameumbwa mtu kutokana na maji yanayo toka kwa nguvu.

[7] Maji haya yanatoka baina ya uti wa mgongo na mbavu za mwanamume na mwanamke. S'ULB ni sehemu za uti wa mgongo; na TARAAIB ni mafupa ya vifua, yaani mbavu. Masomo ya watoto wanapo kuwa ndani ya matumbo ya mama zao (Embryology). yamedhihirisha kuwa viini vya vyombo vya uzazi na mkojo katika mtoto ndani ya tumbo la mama yake vinadhihiri baina ya khalaya (cells) za mishipa itakayo kuwa mafupa ya uti wa mgongo, na baina ya khalaya zitakazo kuwa mafupa ya kifua. Mafigo hubakia pahala pake, na kokwa huteremka kwenye pahala pake pa kawaida katika pumbu wakati wa kuzaliwa. Na juu ya kuteremka kokwa chini mishipa inayo inywesha damu maisha yake yote inatokana na mishipa ya mafigo. Hali kadhaalika mishipa ya Navo inayo peleka kuhisi na ikasaidia kuzalisha vitu vya uhai na yaliyo khusiana na hayo kama maji yanayo toka kwenye mshipa wa kifua wa kumi unao tokana na ubongo wa uti wa mgongo kwenye kipingili cha kumi na kumi na moja. Yaliyo wazi kutokana na hayo ni kwamba vyombo vya uzazi na vinavyo lisha vyombo hivyo, na vyombo vya damu, vipo katika kiwiliwili baina ya uti wa mgongo na mbavu.

[8] Hakika Mwenyezi Mungu aliye muumba hivi hapo mwanzo, bila ya shaka ni Muweza wa kumuumba tena baada ya kufa kwake.

[9] Siku dhamiri zitapo fanyiwa mtihani, na zitengwe mbali mbali baina ya ziliyo kuwa nzuri na ziliyo kuwa mbovu.

[10] Basi hapana mtu wakati huo ataye kuwa na nguvu ya kujikinga nafsi yake, wala hatakuwa na msaidizi wa kumnusuru.

[11] Naapa kwa mbingu yenye mvua inayo rejea na kuja mara kwa mara!

[12] Na ardhi inayo pasuka kwa kuchipuka mimea!

[13] Hakika hii Qur'ani ni yenye kupambanua baina ya kweli na uwongo.

[14] Wala haina nuksani yoyote ya mchezo au maskhara.

[15] Hakika hao wanao ikadhibisha Qur'ani wanaipangia njama kutaka kuiharibia, njama zenye kufikia ukomo!

[16] Lakini Mimi nitawalipa, na nitavipambanisha hivyo vitimbi vyao kwa vitimbi madhubuti ambavyo hawataweza kujikinga navyo.

[17] Basi wangojee hao makafiri! Wape muhula wa karibu mpaka nikuamrishe amri gani kali ya kuwatendea.

[1] Litakase jina la Mola wako Mlezi lilio tukufu na kila kitu kisicho kuwa kinaelekeana nalo.

[2] Aliye umba kila kitu, na akajaalia uumbaji wote sawa sawa katika hukumu na kupangana.

[3] Na akakadiria kwa kila kitu kwa mujibu wa maslaha yake, na akakiongoza.

[4] Na ambaye akatoa kwenye ardhi mimea namna mbali mbali ya kuwalisha wanyama.

[5] Na akaifanya mimea hiyo baada ya kuwa kijani imestawi, ikakauka na imekuwa myeusi!

[6] Ewe Muhammad! Sisi tutakujaalia uwe ni mwenye kuisoma Qur'ani kwa ufunuo kutoka kwetu, na wala hutosahau utacho kihifadhi.

[7] Isipo kuwa anacho taka Mwenyezi Mungu ukisahau, kwani hakika Yeye Mtukufu anayajua wanayo yadhihirisha waja wake na wanayo yaficha, ikiwa maneno au vitendo.

[8] Na tutakuwezesha kupita njia ya kufikilia kwa wepesi mambo yako yote.

[9] Basi wakumbushe watu ikiwa kukumbusha kutaleta manufaa, kwani inavyo faa ndio kuwanafiisha.

[10] Watanafiika kwa ukumbusho wako wanao mwogopa Mwenyezi Mungu.

[11] Na atajitenga na ukumbusho mpotovu anaye shikilia kufanya inda na ukafiri.

[12] Ambaye ataingia kwenye Moto mkubwa ulio andaliwa kuwa ndio malipo yake.

[13] Tena hatokufa huko Motoni akapumzika kwa kifo, wala hawi hai kwa uhai wa kustarehe nao.

[14] Hakika amefuzu mwenye kujisafisha na ukafiri na maasi.

[15] Na akalikumbuka jina la Muumba wake kwa moyo wake na ulimi wake, na akaswali kwa unyenyekevu kama itakikanavyo.

[16] Bali nyinyi hamfanyi hayo yanayo pelekea kufanikiwa, lakini katika hima zenu mnatanguliza maisha ya duniani kuliko ya Akhera.

[17] Na Akhera ni bora kuliko dunia, kwa usafi wa neema zake, na ni yenye kubaki na kudumu zaidi.

[18] Hakika haya yote yaliyo tajwa katika Sura hii bila ya shaka yamethibitishwa katika Vitabu vya zamani,

[19] Vitabu vya Ibrahimu na Musa; kwani haya yamewafikiana na mafunzo ya dini zote na yamesajiliwa katika Vitabu vya mbinguni.

[1] Je! Ewe Muhammad! Imepata kukujia hadithi ya Kiyama ambacho kwa vitisho vyake kitawafanya watu wazimie?