سُورَةُ الفجر

Sura Al-Fajr

Sura 89 · 30 aya · Ya Makka · Juzuu 30 · Msahafu Ukurasa 593–594 · Hizb 60

Sikiliza sura nzima

Msomaji: Mishary Rashid Alafasy

Msomaji Rudia

Neno kwa neno Onyesha maana chini ya kila neno Onyesha matamshi chini ya kila neno Maana za maneno kwa

89:1
۝١
Naapa kwa alfajiri! [1]

Tanbihi
[1] Naapa kwa mwangaza wa asubuhi unapo ufukuza usiku.
89:2
۝٢
Na kwa masiku kumi! [2]

Tanbihi
[2] Na kwa masiku kumi yaliyo tukuzwa na Mwenyezi Mungu. (Na hayo ni masiku kumi ya mwanzo wa Mwezi wa Alhaj, Mfungo Tatu).
89:3
۝٣
Na kwa viwili viwili na kimoja kimoja! [3]

Tanbihi
[3] Na shafi' yaani hisabu inayo gawika kwa mbili, kama 4, 6, 8 n.k. na witri, yaani isiyo gawika kwa mbili, kama 1, 3, 5 n.k. katika kila kitu.
89:4
۝٤
Na kwa usiku unapo pita! [4]

Tanbihi
[4] Na kwa usiku unapo pita kwa kwenda ulimwengu kwa namna ya ajabu.
89:5
۝٥
Je! Hapana katika haya kiapo kwa mwenye akili? [5]

Tanbihi
[5] Je! Katika vitu vilivyo tajwa vinavyo onekana kwa akili hapana kiapo cha kukinaisha?
89:6
۝٦
Kwani hukuona jinsi Mola wako Mlezi alivyo wafanya kina A'di? [6]

Tanbihi
[6] Kwani hujui jinsi Mola wako Mlezi alivyo wateremshia adhabu yake kaumu ya Hud, ?
89:7
۝٧
Wa Iram, wenye majumba marefu? [7]

Tanbihi
[7] Watu wa Iram wenye majengo marefu?
89:8
۝٨
Ambao haukuumbwa mfano wake katika nchi? [8]

Tanbihi
[8] Ambayo haikupata kujengwa mfano wake kwa umadhubuti na ujenzi katika nchi.
89:9
۝٩
Na Thamudi walio chonga majabali huko bondeni? [9]

Tanbihi
[9] Kwani hukujua jinsi Mola wako Mlezi alivyo teremsha adhabu yake kwa Thamudi, kaumu ya Saleh, walio chonga majabali kujengea nyumba zao huko bondeni?
89:10
۝١٠
Na Firauni mwenye vigingi? [10]

Tanbihi
[10] Au kwani hukujua vipi Mola wako Mlezi alivyo wateremshia adhabu yake Firauni mwenye majeshi yaliyo upa nguvu ufalme wake kama vigingi vinavyo simamisha makhema?
89:11
۝١١
Ambao walifanya jeuri katika nchi? [11]

Tanbihi
[11] Ambao walipita mipaka katika nchi?
89:12
۝١٢
Wakakithirisha humo ufisadi? [12]

Tanbihi
[12] Na wakazidisha kufanya uharibifu kwa ukafiri na udhalimu?
89:13
۝١٣
Basi Mola wako Mlezi aliwapiga mjeledi wa adhabu. [13]

Tanbihi
[13] Basi Mola wako Mlezi aliwateremshia adhabu kali ya kuwaunguza.
89:14
۝١٤
Hakika Mola wako Mlezi yupo kwenye mavizio anawavizia. [14]

Tanbihi
[14] Hakika Mola wako Mlezi anaviangalia vitendo vya watu, na anawahisabia, na atakuja kuwalipa kwavyo.
89:15
۝١٥
Ama mtu anapo jaribiwa na Mola wake Mlezi, akamkirimu na akamneemesha, husema: Mola wangu Mlezi amenikirimu! [15]

Tanbihi
[15] Ama mtu akijaribiwa na Mola wake Mlezi na akamkirimu, na akamneemesha kwa mali na cheo na nguvu, basi husema kwa kughurika na hayo: Mola wangu Mlezi amenitukuza kwa kuwa ninastahiki haya!
89:16
۝١٦
Na ama anapo mjaribu akampunguzia riziki yake, husema: Mola wangu Mlezi amenitia unyonge! [16]

Tanbihi
[16] Na pindi Mola wake Mlezi akimjaribu mtu kwa kumdhikisha riziki, basi hughafilika na hikima ya hayo na husema: Mola wangu Mlezi kanidhalilisha!
89:17
۝١٧
Sivyo hivyo! Bali nyinyi hamuwakirimu mayatima, [17]

Tanbihi
[17] Wacheni mtindo huo! Mambo siyo hayo kama msemavyo; bali nyinyi hamumkirimu yatima;
89:18
۝١٨
Wala hamhimizani kulisha masikini; [18]

Tanbihi
[18] Wala hamhimizani kuwalisha masikini;
89:19
۝١٩
Na mnakula urithi kwa ulaji wa pupa, [19]

Tanbihi
[19] Na mnakula mali ya urithi kwa pupa, hamchagui linalo faa na lisilo faa.
89:20
۝٢٠
Na mnapenda mali pendo la kupita kiasi. [20]

Tanbihi
[20] Na mnayapenda mali mno, yanayo kupelekeeni kupapatika katika kuyakusanya na ubakhili wa kuyatumia.
89:21
۝٢١
Sivyo hivyo! Itakapo vunjwa ardhi vipande vipande, [21]

Tanbihi
[21] Wacheni vitendo hivyo! Kwani inakungojeeni siku itapo lazwa ardhi iwe sawa sawa,
89:22
۝٢٢
Na akaja Mola wako Mlezi na Malaika safu safu, [22]

Tanbihi
[22] Na aje Mola wako Mlezi kama anavyo stahiki kuja kwake Subhanahu na Malaika waje kwa safu safu;
89:23
۝٢٣
Na ikaletwa Jahannamu siku hiyo, siku hiyo mtu atakumbuka! Lakini kukumbuka huko kutamfaa nini? [23]

Tanbihi
[23] Na siku hiyo iletwe Jahannamu, nyumba ya adhabu, siku hiyo yatapo tokea hayo mwanaadamu atakumbuka aliyo yaharibu - lakini wapi! Kukumbuka huko kumfae nini, na wakati umekwisha pita?
Ukurasa 594
89:24
۝٢٤
Atasema: Laiti ningeli jitangulizia kwa uhai wangu! [24]

Tanbihi
[24] Atasema kwa majuto: Laiti ningeli jitangulizia katika dunia vitendo vyema vya kunifaa katika maisha ya Akhera!
89:25
۝٢٥
Basi siku hiyo hataadhibu yeyote namna ya kuadhibu kwake. [25]

Tanbihi
[25] Siku hiyo zitakuwa hali hizi, haadhibu mtu kama adhabu ya Mwenyezi Mungu, wala hafungi mtu kama afungavyo Yeye.
89:26
۝٢٦
Wala hatafunga yeyote kama kufunga kwake. [26]

Tanbihi
[26] Siku hiyo zitakuwa hali hizi, haadhibu mtu kama adhabu ya Mwenyezi Mungu, wala hafungi mtu kama afungavyo Yeye.
89:27
۝٢٧
Ewe nafsi iliyo tua! [27]

Tanbihi
[27] Ewe nafsi uliye tulia juu ya Haki!
89:28
۝٢٨
Rejea kwa Mola wako Mlezi umeridhika, na umemridhisha. [28]

Tanbihi
[28] Rejea kwenye radhi ya Mola wako Mlezi nawe uradhi kwa neema ulio pewa, nawe umemridhisha kwa a'mali uliyo ikadimisha.
89:29
۝٢٩
Basi ingia miongoni mwa waja wangu, [29]

Tanbihi
[29] Basi ingia katika kundi la waja wangu walio wema!
89:30
۝٣٠
Na ingia katika Pepo yangu. [30]

Tanbihi
[30] Na ingia katika Pepo yangu, nyumba ya neema ya milele!

Tafsiri: Ali Mohsin Al-Barwani (Ali Mohsin Al-Barwani) — Chanzo: QuranEnc.com · v1.0.1 · Translated by Ali Mohsen Al-Barwani

Soma kwa lugha nyingine

English العربية বাংলা اردو Bahasa Indonesia Türkçe Français Bahasa Melayu فارسی Nederlands Hausa Русский 中文 Shqip ไทย