سُورَةُ الأعلى

Sura Al-A'laa

Sura 87 · 19 aya · Ya Makka · Juzuu 30 · Msahafu Ukurasa 591–592 · Hizb 60

Sikiliza sura nzima

Msomaji: Mishary Rashid Alafasy

Msomaji Rudia

Neno kwa neno Onyesha maana chini ya kila neno Onyesha matamshi chini ya kila neno Maana za maneno kwa

87:1
۝١
Litakase jina la Mola wako Mlezi aliye juu kabisa! [1]

Tanbihi
[1] Litakase jina la Mola wako Mlezi lilio tukufu na kila kitu kisicho kuwa kinaelekeana nalo.
87:2
۝٢
Aliye umba, na akaweka sawa! [2]

Tanbihi
[2] Aliye umba kila kitu, na akajaalia uumbaji wote sawa sawa katika hukumu na kupangana.
87:3
۝٣
Na ambaye amekadiria na akaongoa,. [3]

Tanbihi
[3] Na akakadiria kwa kila kitu kwa mujibu wa maslaha yake, na akakiongoza.
87:4
۝٤
Na aliye otesha malisho! [4]

Tanbihi
[4] Na ambaye akatoa kwenye ardhi mimea namna mbali mbali ya kuwalisha wanyama.
87:5
۝٥
Kisha akayafanya makavu, meusi. [5]

Tanbihi
[5] Na akaifanya mimea hiyo baada ya kuwa kijani imestawi, ikakauka na imekuwa myeusi!
87:6
۝٦
Tutakusomesha wala hutasahau! [6]

Tanbihi
[6] Ewe Muhammad! Sisi tutakujaalia uwe ni mwenye kuisoma Qur'ani kwa ufunuo kutoka kwetu, na wala hutosahau utacho kihifadhi.
87:7
۝٧
Ila akipenda Mwenyezi Mungu. Hakika Yeye anayajua yaliyo dhaahiri na yaliyo fichikana. [7]

Tanbihi
[7] Isipo kuwa anacho taka Mwenyezi Mungu ukisahau, kwani hakika Yeye Mtukufu anayajua wanayo yadhihirisha waja wake na wanayo yaficha, ikiwa maneno au vitendo.
87:8
۝٨
Na tutakusahilishia yawe mepesi. [8]

Tanbihi
[8] Na tutakuwezesha kupita njia ya kufikilia kwa wepesi mambo yako yote.
87:9
۝٩
Basi kumbusha, kama kukumbusha kunafaa. [9]

Tanbihi
[9] Basi wakumbushe watu ikiwa kukumbusha kutaleta manufaa, kwani inavyo faa ndio kuwanafiisha.
87:10
۝١٠
Atakumbuka mwenye kuogopa. [10]

Tanbihi
[10] Watanafiika kwa ukumbusho wako wanao mwogopa Mwenyezi Mungu.
87:11
۝١١
Na atajitenga mbali nayo mpotovu, [11]

Tanbihi
[11] Na atajitenga na ukumbusho mpotovu anaye shikilia kufanya inda na ukafiri.
87:12
۝١٢
Ambaye atauingia Moto mkubwa. [12]

Tanbihi
[12] Ambaye ataingia kwenye Moto mkubwa ulio andaliwa kuwa ndio malipo yake.
87:13
۝١٣
Tena humo hatakufa wala hawi hai. [13]

Tanbihi
[13] Tena hatokufa huko Motoni akapumzika kwa kifo, wala hawi hai kwa uhai wa kustarehe nao.
87:14
۝١٤
Hakika amekwisha fanikiwa aliye jitakasa. [14]

Tanbihi
[14] Hakika amefuzu mwenye kujisafisha na ukafiri na maasi.
87:15
۝١٥
Na akakumbuka jina la Mola wake Mlezi, na akaswali. [15]

Tanbihi
[15] Na akalikumbuka jina la Muumba wake kwa moyo wake na ulimi wake, na akaswali kwa unyenyekevu kama itakikanavyo.
Ukurasa 592
87:16
۝١٦
Lakini nyinyi mnakhiari maisha ya dunia! [16]

Tanbihi
[16] Bali nyinyi hamfanyi hayo yanayo pelekea kufanikiwa, lakini katika hima zenu mnatanguliza maisha ya duniani kuliko ya Akhera.
87:17
۝١٧
Na Akhera ni bora na yenye kudumu zaidi. [17]

Tanbihi
[17] Na Akhera ni bora kuliko dunia, kwa usafi wa neema zake, na ni yenye kubaki na kudumu zaidi.
87:18
۝١٨
Hakika haya yamo katika Vitabu vya mwanzo, [18]

Tanbihi
[18] Hakika haya yote yaliyo tajwa katika Sura hii bila ya shaka yamethibitishwa katika Vitabu vya zamani,
87:19
۝١٩
Vitabu vya Ibrahimu na Musa. [19]

Tanbihi
[19] Vitabu vya Ibrahimu na Musa; kwani haya yamewafikiana na mafunzo ya dini zote na yamesajiliwa katika Vitabu vya mbinguni.

Tafsiri: Ali Mohsin Al-Barwani (Ali Mohsin Al-Barwani) — Chanzo: QuranEnc.com · v1.0.1 · Translated by Ali Mohsen Al-Barwani

Soma kwa lugha nyingine

English العربية বাংলা اردو Bahasa Indonesia Türkçe Français Bahasa Melayu فارسی Nederlands Hausa Русский 中文 Shqip ไทย