Quran Touchسُورَةُ العاديات
Sura Al-Aadiyaat
Sikiliza sura nzima
Msomaji: Mishary Rashid Alafasy- 100:1١
Naapa kwa farasi wendao mbio wakipumua, [1]
Tanbihi
[1] Ninaapa kwa farasi wa Jihadi wendao mbio, na huku pumzi zao zinasikilizana kwa sauti inayo itwa "Dh'abh'an".
- 100:2٢
Na wakitoa moto kwa kupiga kwato zao chini, [2]
Tanbihi
[2] Na kwa farasi hao ambao hutoa cheche za moto zinapo gonga kwato zao kwenye ardhi wanapo kwenda.
- 100:3٣
Wakishambulia wakati wa asubuhi, [3]
Tanbihi
[3] Na kwa farasi hao wanao washambulia maadui asubuhi kabla jua halijachomoza;
- 100:4٤
Huku wakitimua vumbi, [4]
Tanbihi
[4] Wakatimua mavumbia mengi, farasi hao, kati ya makundi ya maadui!
- 100:5٥
Na wakijitoma kati ya kundi, [5]
Tanbihi
[5] Ikawa vumbi limewagubika maadui hata wakaingiwa kiwewe na kufazaika.
- 100:6٦
Hakika mwanaadamu ni mtovu wa fadhila kwa Mola wake Mlezi! [6]
Tanbihi
[6] Hakika mwanaadamu ni mwingi wa kuzikufuru neema za Mola wake Mlezi ambazo hazikadiriki.
- 100:7٧
Na hakika yeye mwenyewe bila ya shaka ni shahidi wa hayo! [7]
Tanbihi
[7] Na hakika yeye mwenyewe bila ya shaka atakuwa mwingi wa kuja jishuhudia huko Akhera kwa kuungama madhambi yake.
- 100:8٨
Naye hakika bila ya shaka ana nguvu za kupenda mali! [8]
Tanbihi
[8] Na hakika yeye kwa uchoyo na kuyapenda mali alio nayo, ni bakhili, hatoi kama inavyo mwajibikia katika mali yake.
- 100:9٩
Kwani hajui watakapo fufuliwa waliomo makaburini? [9]
Tanbihi
[9] Kwani hajui mwisho wa hali yake, hata hajui wakitolewa maiti waliomo makaburini,
- 100:10١٠
Na yakakusanywa yaliomo vifuani? [10]
Tanbihi
[10] Na vikakusanywa viliomo vifuani navyo vimekwisha sajiliwa katika madaftari yao, yakiwa mema au mabaya waliyo yatenda?
- 100:11١١
Kuwa hakika Mola wao Mlezi siku hiyo bila ya shaka atakuwa na khabari zao wote! [11]
Tanbihi
[11] Kwamba hakika Mlezi wao na Muumba wao bila ya shaka anajua vyema vitendo vyao na malipo yao Siku ya Kufufuliwa na Kulipwa.
Tafsiri: Ali Mohsin Al-Barwani (Ali Mohsin Al-Barwani) — Chanzo: QuranEnc.com · v1.0.1 · Translated by Ali Mohsen Al-Barwani
Soma kwa lugha nyingine
EnglishالعربيةবাংলাاردوBahasa IndonesiaTürkçeFrançaisBahasa MelayuفارسیNederlandsHausaРусский中文Shqipไทย