سُورَةُ الليل

Sura Al-Lail

Sura 92 · 21 aya · Ya Makka · Juzuu 30 · Msahafu Ukurasa 595–596 · Hizb 60

Sikiliza sura nzima

Msomaji: Mishary Rashid Alafasy

Msomaji Rudia

Neno kwa neno Onyesha maana chini ya kila neno Onyesha matamshi chini ya kila neno Maana za maneno kwa

92:1
۝١
Naapa kwa usiku unapo funika! [1]

Tanbihi
[1] Naapa kwa usiku kinapo enea kiza chake!
92:2
۝٢
Na mchana unapo dhihiri! [2]

Tanbihi
[2] Na naapa kwa mchana unapo zagaa mwangaza wake!
92:3
۝٣
Na kwa Aliye umba dume na jike! [3]

Tanbihi
[3] Na naapa kwa Mjuzi aliye umba viwili viwili, dume na jike, katika kila vinavyo zaliwa!
92:4
۝٤
Hakika juhudi zenu bila ya shaka ni mbali mbali. [4]

Tanbihi
[4] Hakika juhudi zenu bila ya shaka zimekhitalifiana; kwani wapo wenye kubahatika katika juhudi zao, na wako wasio bahatika.
92:5
۝٥
Ama mwenye kutoa na akamchamngu! [5]

Tanbihi
[5] Ama mwenye kutoa katika Njia ya Mwenyezi Mungu, na akamkhofu Mola wake Mlezi, na kwa hivyo akaepuka anayo yakataza,
92:6
۝٦
Na akaliwafiki lilio jema! [6]

Tanbihi
[6] Na akayakinika kufuata fadhila njema, nayo ni Imani kumuamini Mwenyezi Mungu kwa kumjua,
92:7
۝٧
Tutamsahilishia yawe mepesi. [7]

Tanbihi
[7] Basi Sisi tutamtengenezea awe katika khulka ya wepesi na raha kwa kumwongoza kwenye njia ya kheri.
92:8
۝٨
Na ama mwenye kufanya ubakhili, na asiwe na haja ya wenzake! [8]

Tanbihi
[8] Ama mwenye kufanya ubakhili kwa mali yake asitoe haki ya Mwenyezi Mungu iliomo humo, na akawa hana haja na yatokayo kwa Mwenyezi Mungu,
92:9
۝٩
Na akakanusha lilio jema! [9]

Tanbihi
[9] Na akakadhibisha khulka nzuri,
92:10
۝١٠
Tutamsahilishia yawe mazito! [10]

Tanbihi
[10] Basi huyo tutamtengenezea khulka ambayo inapelekea uzito na mashaka ya milele.
92:11
۝١١
Na mali yake yatamfaa nini atapo kuwa anadidimia? [11]

Tanbihi
[11] Na kitu gani katika adhabu ambacho hayo mali yake yataweza kumkinga nacho, atapo teketea yeye mwenyewe mzima?
92:12
۝١٢
Hakika ni juu yetu kuonyesha uwongofu. [12]

Tanbihi
[12] Hakika ni juu yetu, Sisi, kwa kufuatana na hikima yetu, ndio tuwabainishie viumbe njia ya uwongofu.
92:13
۝١٣
Na hakika ni yetu Sisi Akhera na dunia. [13]

Tanbihi
[13] Na juu yetu Sisi peke yetu, bila ya shaka, hili jambo la kuendesha yaliomo duniani na Akhera.
92:14
۝١٤
Basi nakuonyeni na Moto unao waka! [14]

Tanbihi
[14] Ndio maana tukakutieni khofu ya Moto unao waka na kuripuka!
Ukurasa 596
92:15
۝١٥
Hatauingia ila mwovu kabisa! [15]

Tanbihi
[15] Hawauingii kwa kudumu ila kafiri
92:16
۝١٦
Anaye kadhibisha na kupa mgongo. [16]

Tanbihi
[16] Aliye ikadhibisha Haki na akazipuuza Ishara za Mola wake Mlezi.
92:17
۝١٧
Na mchamngu ataepushwa nao, [17]

Tanbihi
[17] Na atakuwa mbali na huo Moto aliye mwingi wa kujikinga na ukafiri na maasi,
92:18
۝١٨
Ambaye hutoa mali yake kwa ajili ya kujitakasa. [18]

Tanbihi
[18] Amabye hutoa mali yake wakati wa nafasi ili kujisafisha na uchafu wa ubakhili, na najsi ya uchoyo.
92:19
۝١٩
Na wala si kwa kuwa yupo yeyote aliye mfanyia hisani ndio anamlipa. [19]

Tanbihi
[19] Na mtoaji huyu si kama anaye mtu yeyote ambaye ndio anamlipa kwa neema aliyo mfanyia zamani,
92:20
۝٢٠
Ila ni kutaka radhi ya Mola wake Mlezi aliye juu kabisa. [20]

Tanbihi
[20] Bali anatoa hicho kwa kutafuta radhi ya Mola wake Mlezi Mtukufu tu.
92:21
۝٢١
Naye atakuja ridhika! [21]

Tanbihi
[21] Na bila ya shaka atakuja pata kutoka kwa Mola wake Mlezi anacho kitaka kwa njia za ukamilifu kabisa, hata itimie radhi kwake.

Tafsiri: Ali Mohsin Al-Barwani (Ali Mohsin Al-Barwani) — Chanzo: QuranEnc.com · v1.0.1 · Translated by Ali Mohsen Al-Barwani

Soma kwa lugha nyingine

English العربية বাংলা اردو Bahasa Indonesia Türkçe Français Bahasa Melayu فارسی Nederlands Hausa Русский 中文 Shqip ไทย