سُورَةُ النازعات

Sura An-Naazi'aat

Sura 79 · 46 aya · Ya Makka · Juzuu 30 · Msahafu Ukurasa 583–584 · Hizb 59

Sikiliza sura nzima

Msomaji: Mishary Rashid Alafasy

Msomaji Rudia

Neno kwa neno Onyesha maana chini ya kila neno Onyesha matamshi chini ya kila neno Maana za maneno kwa

79:1
۝١
Naapa kwa wanao komoa kwa nguvu! [1]

Tanbihi
[1] Ninaapa kwa kila kilicho pewa uwezo wa kuving'oa vitu kutokana na pahala pao kwa nguvu,
79:2
۝٢
Na kwa wanao toa kwa upole! [2]

Tanbihi
[2] Na kwa kila kilicho pewa uwezo wa kuvitoa vitu kwa utaratibu na ulaini,
79:3
۝٣
Na wanao ogelea! [3]

Tanbihi
[3] Na kwa kila kilicho pewa mbio za kutekeleza kazi yake kwa sahala na wepesi.
79:4
۝٤
Wakishindana mbio! [4]

Tanbihi
[4] Na kwa vinavyo shindania kutimiza waajibu ulio twikwa juu yao kushindania kwa juhudi,
79:5
۝٥
Wakidabiri mambo. [5]

Tanbihi
[5] Na vinavyo dabiri, kupanga, mambo na kuyaendesha kwa mujibu wa vilivyo khusishwa,
79:6
۝٦
Siku kitapo tetemeka cha kutetemeka! [6]

Tanbihi
[6] Bila ya shaka Saa ya Kiyama itafika; hiyo siku ambayo mpulizo wa mwanzo wa barugumu utavitikisa viumbe vyote,
79:7
۝٧
Kifuate cha kufuatia. [7]

Tanbihi
[7] Na mpulizo huo utafuatiwa na wa pili ambao ndio utakao kuwa wa kufufuliwa watu.
79:8
۝٨
Siku hiyo nyoyo zitapiga piga! [8]

Tanbihi
[8] Siku hiyo nyoyo zitapapatika kwa khofu.
79:9
۝٩
Macho yatainama chini! [9]

Tanbihi
[9] Macho ya watu yatakuwa na huzuni, manyonge.
79:10
۝١٠
Sasa wanasema: Ati kweli tutarudishwa kwenye hali ya kwanza? [10]

Tanbihi
[10] Watu hawa husema duniani kwa kukanya kufufuliwa: Ati tutarudishwa sisi baada ya kwisha kufa, tuumbwe tena kama tulivyo kuwa?
79:11
۝١١
Hata tukiwa mifupa iliyo bunguliwa? [11]

Tanbihi
[11] Tukisha kuwa mafupa yaliyo chakaa, ati tutarejeshwa tufufuliwe upya?
79:12
۝١٢
Wanasema: Basi marejeo hayo ni yenye khasara! [12]

Tanbihi
[12] Wanasema, kwa kukanya na kejeli: Kurejea huko kama kukitokea basi ni marejeo ya khasara, na sisi si watu wa kukhasiri.
79:13
۝١٣
Kwa hakika hayo ni ukelele mmoja tu, [13]

Tanbihi
[13] Msidhani kurejea huko ni kuzito. Kwani hayo ni ukelele mmoja tu,
79:14
۝١٤
Mara watakuwa kwenye uwanda wa mkutano! [14]

Tanbihi
[14] Mara maiti wote watahudhurishwa kwenye ardhi ya mkusanyiko!
79:15
۝١٥
Je! Imekufikia hadithi ya Musa? [15]

Tanbihi
[15] Ewe Muhammad! Imekufikilia hadithi ya Musa,
Ukurasa 584
79:16
۝١٦
Mola wake Mlezi alipo mwita katika bonde takatifu la T'uwaa, akamwambia: [16]

Tanbihi
[16] Alipo mwita Mola wake Mlezi katika bonde lilio takaswa, linalo itwa "T'uwa"?
79:17
۝١٧
Nenda kwa Firauni. Hakika yeye amezidi jeuri [17]

Tanbihi
[17] Akaambiwa: Nenda kwa Firauni aliye pindukia mpaka katika udhalimu.
79:18
۝١٨
Umwambie: Je! Unapenda kujitakasa? [18]

Tanbihi
[18] Umwambie: Je! Huelekei kut'ahirika?
79:19
۝١٩
Nami nitakuongoa ufike kwa Mola wako Mlezi, upate kumcha. [19]

Tanbihi
[19] Na mimi nikuongoze upate kumjua Mola wako Mlezi, umwogope.
79:20
۝٢٠
Basi alimwonyesha Ishara kubwa. [20]

Tanbihi
[20] Musa akamwonyesha Firauni miujiza mikubwa.
79:21
۝٢١
Lakini aliikadhibisha na akaasi. [21]

Tanbihi
[21] Lakini Firauni alimkadhibisha Musa kwa aliyo kuja nayo, na akamuasi kwa aliyo mwitia.
79:22
۝٢٢
Kisha alirudi nyuma, akaingia kufanya juhudi. [22]

Tanbihi
[22] Kisha akamgeuzia mgongo, akenda kujitahidi kumpinga.
79:23
۝٢٣
Akakusanya watu akanadi. [23]

Tanbihi
[23] Akawakusanya wachawi, na akawaita watu,
79:24
۝٢٤
Akasema: Mimi ndiye Mola wenu Mlezi mkuu kabisa. [24]

Tanbihi
[24] Akasema: Mimi ndiye Mola wenu Mlezi aliye mkubwa kabisa.
79:25
۝٢٥
Basi hapo Mwenyezi Mungu akamshika kumuadhibu kwa la mwisho na la mwanzo. [25]

Tanbihi
[25] Mwenyezi Mungu akampa adhabu kwa kauli yake ya mwisho, nayo ni vile kusema: Mimi ndiye Mola wenu Mlezi aliye mkubwa kabisa. Na akampa adhabu kwa kauli yake ya mwanzo, nayo ni kumkadhibisha Musa a.s.
79:26
۝٢٦
Kwa hakika katika haya yapo mazingatio kwa wanao ogopa. [26]

Tanbihi
[26] Hakika katika hadithi hiyo yapo mawaidha kwa mwenye kumkhofu Mwenyezi Mungu.
79:27
۝٢٧
Je! Ni vigumu zaidi kukuumbeni nyinyi au mbingu? Yeye ndiye aliye ijenga! [27]

Tanbihi
[27] Enyi mnao kanya kufufuliwa! Kukuumbeni nyinyi ni taabu zaidi au kuziumba mbingu, kuzikusanya sehemu zake zilio tawanyika mbali mbali,
79:28
۝٢٨
Akainua kimo chake, na akaitengeneza vizuri. [28]

Tanbihi
[28] Na kunyanyua kimo chake, na zikakaa sawa hazina tafauti wala ila?
79:29
۝٢٩
Na akautia giza usiku wake, na akautokeza mchana wake [29]

Tanbihi
[29] Na akatia kiza katika usiku wake, na akautokeza mchana wake ukawa na mwangaza?
79:30
۝٣٠
Na juu ya hivyo ameitandaza ardhi. [30]

Tanbihi
[30] Na ardhi baada ya hayo akaikunjua, na akaisawazisha, ikasilihi kukaliwa na watu wake?
79:31
۝٣١
Akatoa ndani yake maji yake na malisho yake, [31]

Tanbihi
[31] Akatoa ndani yake maji yake yanayo tibuka katika chemchem zake, na ikamiminika mito yake, na ikawa na mimea yake ya chakula kwa ajili ya watu na wanyama;
79:32
۝٣٢
Na milima akaisimamisha, [32]

Tanbihi
[32] Na milima akaithibitisha imara
79:33
۝٣٣
Kwa nafuu yenu na mifugo yenu. [33]

Tanbihi
[33] Kwa ajili ya manufaa yenu na wanyama wenu mnao wafuga!
79:34
۝٣٤
Basi itakapo fika hiyo balaa kubwa, [34]

Tanbihi
[34] Kitakapo fika Kiyama ambacho vitisho vyake vitaenea kote,
79:35
۝٣٥
Siku ambayo mtu atakumbuka aliyo yafanya, [35]

Tanbihi
[35] Siku atakapo kumbuka mtu vitendo vyake vya kheri au shari,
79:36
۝٣٦
Na Jahannamu itadhihirishwa kwa mwenye kuona, [36]

Tanbihi
[36] Na Jahannamu ikadhihirishwa wazi, akaiona kila mwenye macho kuwa ndio malipo,
79:37
۝٣٧
Basi ama yule aliye zidi ujeuri, [37]

Tanbihi
[37] Basi ama mwenye kupita mpaka kwa maasi yake,
79:38
۝٣٨
Na akakhiari maisha ya dunia, [38]

Tanbihi
[38] Na akajichagulia nafsi yake maisha yanayo pita njia,
79:39
۝٣٩
Kwa hakika Jahannamu ndiyo makaazi yake! [39]

Tanbihi
[39] Basi Moto wa Jahannamu unao babua upepo wake ndio makaazi yake wala hana mengineyo.
79:40
۝٤٠
Na ama yule anaye ogopa kusimamishwa mbele ya Mola wake Mlezi, na akajizuilia nafsi yake na matamanio, [40]

Tanbihi
[40] Na ama mwenye kukhofu ukubwa na utukufu wa Mola wake Mlezi, na akaizuia nafsi yake na matamanio ya kumpumbaza,
79:41
۝٤١
Basi huyo, Pepo itakuwa ndiyo makaazi yake! [41]

Tanbihi
[41] Basi huyo nyumba ya neema ya Peponi ndio makaazi yake, wala hana penginepo.
79:42
۝٤٢
Wanakuuliza Saa (ya Kiyama) itakuwa lini? [42]

Tanbihi
[42] Ewe Muhammad! Wanakuuliza, ati, khabari za Saa ya Kiyama, itakuwa lini?
79:43
۝٤٣
Una nini wewe hata uitaje? [43]

Tanbihi
[43] Ujuzi wa hayo hauko kwako hata uwatajie.
79:44
۝٤٤
Kwa Mola wako Mlezi ndio mwisho wake. [44]

Tanbihi
[44] Ujuzi wa hayo uko kwa Mola wako Mlezi tu, si kwa mwenginewe. (Nabii Isa a.s. ambaye Wakristo wanasema ni Mwana wa Mungu, au ndiye Mungu, pia anasimuliwa katika Biblia kuwa hakuijua Saa na Siku ya Kiyama. Injili ya Mathayo inanukulu maneno ya Yesu: "Walakini habari ya siku ile na saa ile hakuna aijuaye, hata malaika walio mbinguni, wala Mwana, ila Baba peke yake.")
79:45
۝٤٥
Kwa hakika wewe ni mwonyaji tu kwa mwenye kuikhofu. [45]

Tanbihi
[45] Kwani waajibu wako ni kuwaonya wanao khofu si kuwatangazia wakati wake.
79:46
۝٤٦
Ni kama kwamba wao siku watapo iona (hiyo Saa) hawakukaa ila jioni moja tu, au mchana wake. [46]

Tanbihi
[46] Na wao siku watakayo iona hiyo Saa ya Kiyama ni kama kwamba hawakuishi duniani zaidi kuliko jioni moja tu, au mchana wake.

Tafsiri: Ali Mohsin Al-Barwani (Ali Mohsin Al-Barwani) — Chanzo: QuranEnc.com · v1.0.1 · Translated by Ali Mohsen Al-Barwani

Soma kwa lugha nyingine

English العربية বাংলা اردو Bahasa Indonesia Türkçe Français Bahasa Melayu فارسی Nederlands Hausa Русский 中文 Shqip ไทย